Karenni Gospel Music Albums

ꤢ꤬ꤗꤟꤢ꤭ꤘꤢꤨ꤬ ( ꤁꤂꤀ ) ꤒꤣ꤬ꤐꤟꤢꤧ꤬ꤔꤛꤢꤩ꤭ꤏꤛꤢꤩ꤭

ꤒꤟꤢꤧ꤬ꤊꤝꤤ꤭ꤡꤢꤪꤙꤢꤧ꤭ ꤘꤣ ꤒꤟꤢꤧ꤬ꤗꤟꤢꤩ꤬ꤡꤝꤟꤥ ꤢ꤬ꤑꤢꤩ꤭

1 ꤙꤤ ꤠꤢ꤭ ꤥ꤬ ꤘꤣ ꤒꤟꤢꤧ꤬ꤕꤟꤛꤢꤒꤟꤢꤧ꤬ꤏꤢꤧ꤭ꤊꤢꤨ꤭ ꤢ꤬ꤋꤢꤧ꤭, 
ꤠꤢ꤭ ꤊꤝꤤ꤭ꤞꤢꤧꤐꤟꤢꤪ꤬ꤓꤛꤢ꤬ ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬ ꤚꤢꤪ ꤢ꤬ ꤗꤟꤢꤩ꤬ꤡꤝꤟꤥ ꤠꤢ꤭꤯

2 ꤊꤣ꤮ ꤡꤢꤪꤗꤢ꤬ꤚꤛꤢ꤬ ꤒꤢ꤬ꤡꤟꤢꤨꤕꤚꤟꤢꤧ꤬, ꤗꤟꤢꤩ꤬ꤏꤤ꤭ꤕꤜꤢꤧꤊꤟꤢ꤬ ꤠꤢ꤭ ꤘꤣ 
ꤊꤢ꤬ꤛꤢ꤭ ꤜꤢ꤬ꤟꤥ꤭ꤜꤢ꤬ꤟꤛꤢ꤬, ꤊꤢ꤬ꤛꤢ꤭ ꤊꤢ꤬ꤕꤜꤟꤛꤢ꤬ ꤢ꤬ꤒꤢ꤬ꤋꤢꤨ꤬ꤊꤢꤨ꤭꤯

3 ꤊꤣ꤮ ꤊꤢ꤬ꤛꤢ꤭ ꤜꤢ꤬ꤟꤥ꤭ꤜꤢ꤬ꤟꤛꤢ꤬, ꤡꤢꤪꤗꤢ꤬ꤚꤛꤢ꤬ꤘꤢꤨ꤬ ꤊꤟꤢꤦ ꤗꤟꤢꤩ꤬ ꤞꤤ꤭ ꤖꤢꤨꤒꤢꤩ꤭ ꤕꤢ꤭ ꤟꤟꤢꤧ꤭?
ꤢ꤬ ꤊꤟꤢꤦ ꤡꤤ꤬ꤚꤛꤢ꤬ꤡꤟꤛꤢꤩ꤭ ꤜꤣꤕꤟꤥ ꤞꤤ꤭ ꤙꤢ꤮ ꤒꤢꤩ꤭ꤕꤢ꤭ ꤟꤟꤢꤧ꤭?

4 ꤕꤚꤟꤢꤧ꤬ꤓꤛꤢ꤬ꤏꤢꤒꤟꤢꤧ꤬ ꤢ꤬ꤕꤜꤟꤢꤧ ꤘꤣ ꤢ꤬ ꤡꤛꤣ꤭ꤚꤢ꤬ꤗꤤ ꤒꤢ꤬ꤟꤢꤩ꤬ ꤊꤟꤢꤦ ꤏꤛꤢꤔꤟꤌꤣ꤭ꤜꤟꤢꤪ꤭ ꤞꤤ꤭ꤔꤟꤢꤩ꤯
ꤢꤨ꤭ ꤊꤟꤢꤦ ꤏꤢꤦꤢꤦ꤭ ꤞꤤ꤭ ꤔꤢ ꤗꤤ꤬ꤊꤜꤝꤥ ꤘꤣ ꤢ꤬ꤊꤟꤛꤢ꤭ ꤜꤟꤤ꤬ꤊꤢ꤬ꤞꤝꤤ꤯

5 ꤠꤢ꤭ ꤡꤛꤣꤥ꤬ ꤖꤢꤨ ꤏꤤ꤭ꤕꤚꤟꤢꤩ ꤔꤌꤣ꤬ ꤘꤣ ꤗꤢꤧꤏꤛꤢꤧꤊꤟꤢꤩ, ꤠꤢ꤭ ꤡꤛꤣꤥ꤬ ꤘꤣ 
ꤊꤢꤩ꤬ꤘꤢ꤬ ꤜꤟꤢꤩꤞꤢꤦ꤬ꤊꤢꤨ꤭ ꤢ꤬ꤋꤢꤨ꤬ꤢ꤬ꤋꤛꤢꤩ꤭, ꤢ꤬ꤡꤟꤛꤢꤩ꤭ꤢ꤬ꤡꤟꤢꤦ꤬ꤔꤛꤢ꤬ꤡꤢꤪ ꤠꤢ꤭꤯

6 ꤠꤢ꤭ ꤡꤛꤣꤥ꤬ ꤑꤟꤢꤩ꤭꤮ ꤒꤟꤣꤊꤟꤌꤣ꤭ ꤔꤛꤢ꤬ꤡꤢꤪ ꤔꤢ 
ꤊꤢ꤬ꤛꤢ꤭ ꤘꤣ ꤢ꤬ ꤞꤢꤧꤓꤢꤩ꤬ꤞꤢꤧꤒꤢ꤬ꤋꤥ꤭ ꤒꤟꤢꤧ꤬ꤕꤟꤢꤩ꤭ꤒꤟꤢꤧ꤬ꤘꤝꤥ꤭꤯

7 ꤠꤢ꤭ ꤞꤢꤧꤐꤟꤢꤦ ꤕꤚꤢꤧꤒꤢꤦ꤮ ꤒꤟꤢꤧ꤬ꤕꤟꤢꤩ꤭ꤒꤟꤢꤧ꤬ꤘꤝꤥ꤭꤯
ꤙꤤ ꤠꤢ꤭ ꤟꤢꤩꤙꤢꤧ꤬ ꤒꤟꤢꤧ꤬ꤕꤟꤢꤩ꤭ꤒꤟꤢꤧ꤬ꤘꤝꤥ꤭ ꤢ꤬ꤋꤢꤧ꤭, 
ꤢꤧ꤬ꤞꤤ꤭ ꤞꤢꤧꤐꤟꤢꤦ ꤏꤛꤣ꤭ꤏꤢꤦ꤮ ꤕꤚꤢꤧ ꤒꤟꤢꤧ꤬ꤏꤢꤒꤟꤢꤧ꤬ꤕꤟꤢ꤭꤯
Text: © 2010 Christian Far East Ministry; Audio: © 2012 Hosanna